तपाईंका चुनौतीहरूतर्फ दौडनुहोस्
दाऊद एक किशोर र गोठाला थिए, जसमा कुनै सैनिक तालिम, अनुभव वा उपकरण थिएन। उनीसँग एउटा गुलेली र पाँचवटा चिल्ला ढुङ्गा मात्र थिए। गोल्यत उनीभन्दा लगभग दुई गुणा ठूलो, अत्यन्त शक्तिशाली र पूर्ण हातहतियार लगाएको अनुभव प्राप्त सैनिक पेशेवर थिए। तपाईं सोच्नुहोला कि दाऊदले गोल्यतलाई लुकिछिपी आक्रमण गर्न खोज्थे होला। तर जब तपाईंलाई थाहा हुन्छ तपाईं को हुनुहुन्छ, जब तपाईंलाई थाहा हुन्छ कि तपाईं सुसज्जित र सशक्त हुनुहुन्छ, जब तपाईंलाई थाहा हुन्छ कि परमेश्वर तपाईंको पक्षमा हुनु संसार तपाईंको विरुद्धमा हुनुभन्दा बढी महत्वपूर्ण छ, तब तपाईं आफ्ना चुनौतीहरूबाट भाग्नुहुन्न; तपाईं आफ्ना चुनौतीहरूतर्फ दौडनुहुनेछ।
के तपाईंलाई थाहा छ परमेश्वरले तपाईंलाई के दिनुभएको छ? के तपाईंलाई थाहा छ कि तपाईंसँग आफ्नो नियतिको हरेक ढोका खोल्न आवश्यक कुरा छ? परमेश्वरले भित्र केही महत्त्वपूर्ण नराखी कसैलाई पनि सृष्टि गर्नुहुन्न। त्यसैले शत्रुले तपाईंलाई आफू पर्याप्त छैन भन्ने विश्वास दिलाउन धेरै प्रयास गर्छ। तपाईंसँग भएको कुरा तुच्छ, पर्याप्त नभएको जस्तो देखिन सक्छ, तर जब परमेश्वरले यसमा फुक्नुहुन्छ, यो पर्याप्त भन्दा बढी हुनेछ। अभावको मानसिकतामा नबाँच्नुहोस्।
१ शमूएल १७:४५-४७
[४५] दाऊदले जवाफ दिए, “तँ त मसँग लड्न तरवार, भाला र बर्छा लिएर आएको छस्, तर म तँसँग लड्न तैंले विरोध गरेको इस्राएलका फौजहरूका परमेश्वर, सर्वशक्तिमान् परमप्रभुको नाउँमा आएको छु। [४६] आजको दिन परमप्रभुले तँलाई मेरो हातमा सुम्पिदिनुहुनेछ, र म तँलाई मारेर तेरो टाउको काट्नेछु। आज पलिश्तीहरूका लाश आकाशका चरा र जमिनका जनावरहरूलाई खुवाउनेछु, र इस्राएलमा एउटा परमेश्वर हुनुहुँदोरहेछ भनी सारा संसारले थाहा पाउनेछ। [४७] यहाँ भेला भएका सबैले जान्नेछन् कि परमप्रभुले न त तरवार न भालाद्वारा बचाउनुहुन्छ। किनभने लड़ाइँ परमप्रभुकै हो, र उहाँले तिमीहरू सबैलाई हाम्रा हातमा सुम्पिदिनुहुनेछ।”
